თბილისში საბავშვო ფილმების საერთაშორისო ფესტივალი „ოქროს პეპელა“ გაიმართება

610

29 მაისიდან 1 ივნისის ჩათვლით, თბილისი უკვე მეცხრედ უმასპინძლებს საბავშვო ფილმების საერთაშორისო ფესტივალს. ინფორმაციას საქართველოს კინემატოგრაფიის ეროვნული ცენტრი ავრცელებს.

“ოქროს პეპელა” 2011 წლიდან იმართება. პროექტის მიზანია აღმოაჩინოს, წაახალისოს და საზოგადოებას გააცნოს კინოხელოვნების მოყვარული ნიჭიერი ბავშვები და მათი შემოქმედება. აგრეთვე,  გამარჯვებულები წარადგინოს საერთაშორისო კინოფორუმებსა და ფესტივალებზე.

ფესტივალის მონაწილეები არიან 18 წლამდე ასაკის მოზარდები, როგორც საქართველოდან, ასევე მსოფლიოს სხვადასხვა ქვეყნიდან. მონაწილეები ფესტივალის საკონკურსო და არასაკონკურსო პროგრამაში წარადგენენ დამოუკიდებლად შექმნილ, 7 წუთამდე ქრონომეტრაჟის ანიმაციურ, დოკუმენტურ ან მხატვრულ ფილმებს.

წელს „ოქროს პეპელას“ ისტორიაში უცხოური ფილმების რეკორდული რიცხვი დაფიქსირდა. სულ ფესტივალზე წარმოდგენილი იქნება 92 ფილმი, აქედან 47 უცხოური და 45 ქართული. ფილმებს პროფესიონალებისგან შემდგარი ჟიური შეაფასებს, რომელსაც კინოკრიტიკოსი ლუდმილა საენკოვა – მელნიცკაია (ბელორუსი) უხელმძღვანელებს.

ფესტივალის ორგანიზატორები არიან თბილისის ევროპული სკოლა და კომპანია “ოქროს პეპელა”, ხოლო მხარდამჭერები – ევროპის საბავშვო ფილმების ასოციაცია, საქართველოს კინემატოგრაფიის ეროვნული ცენტრი, ქალაქ თბილისის მერია, კინოსტუდია “ქართული ფილმი” და სხვა.