მიშო ანთაძის სრულმეტრაჟიანი დოკუმენტური ფილმის “მოსავალი” აზიური პრემიერა კორეაში, ჯონჯუს საერთაშორისო კინოფესტივალზე შედგა, სადაც ფილმი NETPAC Award-ით დააჯილდოვეს. ინფორმაციას საქართველოს კინემატოგრაფიის ეროვნული ცენტრი ავრცელებს.
„მოსავალი“ ქართულ-ამერიკული კოპროდუქციაა. ფილმის პროდიუსერია ნათია გულიაშვილი. მოვლენები კახეთში ვითარდება. ამ აგროკულტურულად მდიდარი მიწის მაცხოვრებლები ვირტუალური მოსავალის მოპოვების ციებ-ცხელებით არიან შეპყრობილნი. “მოსავალი” ჩუმი დაკვირვებაა ადამიანის, ლანდშაფტისა და ტექნოლოგიის ურთიერთკავშირზე კრიპტოვალუტის ეპოქაში.
ფილმის „მოსავალი“ მსოფლიო პრემიერა, რამდენიმე თვის წინ როტერდამის საერთაშორისო კინოფესტივალზე შედგა.
